Act 22 | KYG | STEP | Polo'a, Nafalu'nimogitapa'e afo'nimogitapa'e'mo ge'nimo afiyo. Nagaefe'mo hu'apae'mo, ani kava nehiye ina kava nehiye hu'a nehaya gelefe'mo mago gemo hugesuve, huno hapa pai'niye.

Acts 22

1 Polo'a, Nafalu'nimogitapa'e afo'nimogitapa'e'mo ge'nimo afiyo. Nagaefe'mo hu'apae'mo, ani kava nehiye ina kava nehiye hu'a nehaya gelefe'mo mago gemo hugesuve, huno hapa pai'niye. 2 Yu vaya'ai gefati'mo hu'nige'a afite'apae'mo mago'e hu'a ge osu'a afa'a afi'nae. 3 Polo'a, Yu vekamo mai'ne'na Silisiya kotega taonimo agi'amo Tasasi taonifi'mo ita'nimo'mo alino natetege'nae'mo e'na mani Yulusalemu taonifi'mo ko si'na mai'nove. Mai'nogeno Gameliyelo'a muki laginago vaya'ai ke'aepa gemo alino naya male'nige'na alagepa hu'na afi'nove. Lapakaemo hemenimo nehaya agufa kava'mo hu'na Goti kate'mo nayamukiki hu'na u'nove. 4 Nagaemo saufa mono gemo akame nehaya vaya'mo faligae, hu'na hute'na naini hu'na apatete'na ve a'nemo kalavusi hu'na apate'nove. 5 Mono hu'a ne'apataya vaya'aite'mo yagaino ne'apateya veka'e muki kanisole vaya'mogi'e'mo hu'nova kava'nimo ago nage'nayanage'a afa'a nava gemo hu'a lapa paigae. Apakaemo mago avo'mo kae'a nami'nage'na alininu'na Namasakasi taonifi'mo Yu vaya'mo apamisuvafe'mo kae'a nami'nae. Nagaemo ani vaya'mo kalavusi hu'na apatete'na Yulusalemu taonifi'mo apavaleli'na esuge'a lusi hosu apakafu ya'mo alisayafe'mo u'nove.

Polo'a Goti mafa'nemo hamale'nove, huno hu'niya gemae

(Apa 9:3-19; 26:12-18)

6 Nagaemo Namasakasi taonimo haopale'mo ne'ugeno'ae'mo yegemo haineno namotule ae'niya afina'mo lusi ha le ya'mo'a koku'napati'mo nahaopale'mo aeno ha le'nige'nae'mo 7 nagaemo mopafi'mo asagau'na ai'ne'nae'mo afuvana, Solo, Solo, huno, Na kava higeka nagaefe'mo kaini huka ne'natane, huno nafi ge'nige'nae'mo, 8 Ala kava nene, hu'na, Ina lagae, hu'na afi ge'nogeno'ae'mo, Nagaemo Yesu'namo Nasalasa taonifi vekamo kaini huka ne'natana vekamo mai'nove, huno naha pai'niye. 9 Nagae'e'mo magokepi lokae'a u'naya vaya'mogimo ha le ya'mo age'naya'monanafa naha pai'niya ge'amo o'afi'nae. 10 Ala kava nene, hu'na, Na kava hisuve, hu'na afi ge'nogeno Ala kava ne'mo'a naha paino'ae'mo, He tika Namasakasi taonifi'mo ugeno'ao ani taonifi'mo Goti'a ani agufa kava'mo hugane, huno lekana paino kate'niya kavafe'mo kaha paigiyanagi uvo, huno naha pai'niye. 11 Ha le ya'mo'a nagaete'mo aeno ha le'nigeno naulagala'mo aeno ali hu'nige'a nagae'e'mo lokae'a u'naya vaya'mogi nayate alini'a Namasakasi taonifi'mo u'a nate'nae.

12 Mago vekamo agi'amo Ananayasi'a mono vekamo lagae ke'aepa gemo akame nehiya vekamo mai'nige'a muki Namasakasi taonifi'mo mai'naya Yu vaya'mogi agi'ale'mo ali'a asaga hu'a ate'nae. 13 Agaemo nahaopale'mo eno he tino'ae'mo, Konaga'nimo Solo, huno, kaulagala'mo ageka ayako, huno naha pai'nige'nae'mo age'na ayake'nove. 14 Agaemo, Laginago vaya'ai Goti'apimo'a lekana paino kate'niye. Goti'a hogoteno, ani kava'mo huguve, huno agesa afi'niya kavafe'mo ava gemo afiteka ali'ya'amo alino alagepa kava'mo nehiya vekamo ageteka agai'a avayafati gemo afisanafe'mo lekana paino kate'niye. 15 Kagaemo ali'ya'amo ne'alikae'mo age'nana kava'e afi'nana ge'e'mo muki vaya'aife'mo aeka hakalo huka hapa paigane. 16 Na kava higeka afa'a mai'nane. He tika ani'mo faleteka Ala kava ne'mo agi'alefe'mo ge hugeno'ao hosu kavakamo aeno kalo paeno kateno, huno naha pai'niye.

Goti'a Polofe'mo, alu nofi vaya'aitegamo uka aeka hakalo huka hapa paiyo, huno naha pai'niye, huno hapa pai'niya gemae

17 Nagaemo ai'na atagi ne'ne'na Yulusalemu taonifi'mo alopa mono nopi'mo hai'na nunumu'mo nehu'nae'mo alagamuna agegekana hu'na age'nove. 18 Age'novana Ala kava ne'mo'a, Malage huka Yulusalemu taonifati'mo ataleka uvo. Apakaemo nagae nava gemo aeka hakalo huka hapa paisana gemo o'afigayanagi ataleka uvo, huno naha pai'niye. 19 Naha pai'nige'na, Ala kava nene, Ago afi'nayana nagaemo u'na Yu vaya'ai mono nopi'e nopi'e'mo hai'na kagaefe'mo apakesa afi'a fatago nehaya vaya'mo kalavusi hu'na apatege apatege hu'nove. 20 Mago vaya'mogimo kava gemo aeno hakalo huno hapa nepaiya vekamo agi'amo Sitiveni'a amagi'naya afina'mo apakae'e'mo magokepi mai'ne'na, he, kanalene, hute'na amagi'naya vaya'ai kukena'apile'mo yagai'na mai'nove, hu'na ha pai'nogeno'ae'mo 21 Ala kava ne'mo'a, Afa'a uvo. Alu nofi vaya'aitegamo ali'na katesugekae'mo afa'a uvo, huno naha pai'niye, huno hapa pai'niye. 22 Apakaemo Polo'a hu'niya gemo afime afime ne'vageno'ae'mo Polo'a ani gemo hapa pai'nige'a afite'a alopa gefati'mo hu'apae'mo, Ani agufa vekamo ma mopafi o'maigiyanagi amagita ataleyo, hu'a hute'a 23 apano aete'a apaipamo lusi kava huno le'nige'apae'mo kukena'apimo ali'a asagi'a atalege mumusopamo ali'a koku'napi yaga au'a atalege hu'nae. 24 Ati vaya'aite'mo yagaino ne'apateya hogote vekamo'a, Lagae yafa nopi'mo avalelita haitapa Yu vaya'mogi apano ne'ae'a amagigefe'mo hu'naya gemo aepa'amo laha paisigeta afisunafe'mo amagiyo, huno hapa pai'niye. 25 Hapa pai'nige'a avaleli'a hai'a amagisayafe'mo nofi ki'a ate'nageno'ae'mo Polo'a mago vekamo haopale'mo he tino mai'niya vekamo ati vaya'aite'mo yagaino ne'apateya vekae'mo, Lapakae ke'aepa getapimo'a lapakaefe'mo huno'ae'mo, Lomu vaya'mogi yagai'a ne'ataya vekamo agoti hutapa o'ate'naya vekamo amagiyo, huno lapa pai'nifiye, huno afi ge'niye.

26 Yagaino ne'apateya vekamo'a ani gemo afiteno'ae'mo uno yagaino ne'apateya hogote vekae'mo, Nehana kavafe'mo alagepa huka kagesa afiyo. Ani vekamo Lomu vaya'mogi yagai'a ne'ataya vekamo mai'niye, huno ha pai'niye. 27 Yagaino ne'apateya hogote vekamo'a uno Polofe'mo, Lomu vaya'mogi yagai'a nekataya vekamo mai'napiye, huno afi ge'nigeno'ae'mo, He, huno ha pai'niye. 28 Yagaino ne'apateya hogote vekamo'a, yagai'a natesayafe'mo alopa miya'mo ago apami'nove, huno hu'nigeno'ae'mo, Miya fai'nana'monanafa nagaemo ita'nimo'mo alino nate'niya afinateti'mo yagai'a ne'nataya vekamo mai'nove, huno ha pai'niye. 29 Ati vaya'mogi agenoka hu'a afi gesayafe'mo e'a mai'naya ati vaya'mogimo ani gemo afite'apae'mo afa'a atale'nae. Yagaino ne'apateya hogote vekamo'a, Vaehae, huno, Lomu vaya'mogimo yagai'a ne'ataya vekamo seli nofiteti'mo ki'na ate'nove, huno agesa afiteno lusi kava huno koli hu'niye.

30 Ega'amo yagaino ne'apateya hogote vekamo'a Yu vaya'mogi Polofe'mo hosu kava'mo hu'niye, hu'a hu'naya gemo aepa'amo afisiyafe'mo huno'ae'mo, nofi'mo hatu maetapa ateyo, huno hapa paiteno mono hu'a ne'apataya vaya'aite'mo yagai'a ne'apataya vaya'e kanisole vaya'efe'mo ge huno'ae'mo, Etapa alita anupa huta maiyo, huno ge hu'niye. E'a ali'a anupa hu'a mai'nageno'ae'mo Polo'a avalelineno apaulagale'mo alino he tino ate'niye.